Кредит маблағларини талон-торож қилган МЧЖ раҳбарлари аниқланди
73
Бош прокуратура ҳузуридаги Департаментнинг Боёвут туман бўлими томонидан ўтказилган терговга қадар текширувда “I.M.” МЧЖ раҳбари П.Т. ва бошқалар ҳудудий тижорат банки филиалидан ажратилган 1,5 млрд сўм кредит эвазига шартномада белгиланган темирга ишлов бериш, эшик ишлаб чиқариш қолиплари ва ускуналарини харид қилмасдан ушбу маблағларни нақдлаштириб олганлиги аниқланган. Департаментнинг Хатирчи туман бўлими томонидан ўтказилган терговга қадар текширувда фуқаро Ш.Т., “Х.” МФЙ бўйича ҳоким ёрдамчиси А.Д. фуқаро Н.Ж. ва бошқаларнинг номига уларнинг хабардорлигисиз балиқчилик ва асаларичилик фаолиятини ривожлантириш учун 354,9 млн сўм имтиёзли кредит ажратилишига эришиб, ушбу маблағларни бошқа МЧЖларга ўтказиш орқали талон-торож қилганликлари аниқланган.
Департаментнинг Булоқбоши туман бўлими томонидан ўтказилган терговга қадар текширувда “E.X.” МЧЖ раҳбари М.Т. тиббий хизмат кўрсатиш фаолиятини ривожлантириш учун ҳудудий тижорат бакни филиалидан ажратилган 350 млн сўм кредит эвазига тиббий буюмларни харид қилмасдан ушбу маблағларни нақдлаштириб олганлиги аниқланган.
Департаментнинг Чуст туман бўлими томонидан ўтказилган терговга қадар текширувда “Ch.p.” ва “D.c.” МЧЖ раҳбари Д.М. ҳудудий тижорат банки филиалидан ажратилган 214,5 млн сўм имтиёзли кредит эвазига 7 нафар фуқарога чорвачилик маҳсулотларини етказиб бермасдан ушбу маблағларни талон-торож қилганлиги аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда.